Силен циклон донесе обилни дождови и бурни ветрови во Грција во последните два дена. Поплавите носеа сѐ пред себе. Оштетени се многу згради и патишта, а има и срушени мостови. 

Бурниот ветер ги искрши дрвјата, а поради невремето Солун остана во мрак. Во североисточните делови на земјата и на брегот на Егејското Море се забележани ветрови со ураганска сила од 120 км/ч.  Брановите на Егејското Море биле високи и до 10 метри. Се судрија и два брода.

На северот и на истокот од земјата наврнаа од 100 до 200 литри дожд на метар квадратен, а до 400 литри во делови на Халкидики и Родос, предизвикувајќи разорни поплави и порои, објави ЕРТ.

Значи, станува збор за врнежи кои паднале за два дена, а во просек паѓаат во текот на целата зима на овие локации. На некои локации врнело дожд колку што врне во просек за половина година.

Во невремето загинаа тројца луѓе.