Косовскиот премиер Албин Курти до граѓаните од српска националност се обрати на српски јазик. 

Курти соопшти дека почнала замената на регистарските таблички на Република Србија со косовските „РКС“ и дека процесот ќе трае до 31 октомври. Тој кажа дека во следните два месеци ќе можат да ги пререгистрираат возилата во 34 центри за регистрација низ Косово.

„Преминувањето и регистрацијата на возилата на табличките РКС им служи на јавниот ред, законот и сигурноста. Табличките кои ги издава Србија се наследство од режимот на Милошевиќ. Ваквото наследство не треба да биде товар на вашиот грб. На овој начин тоа намерно вe држи изолирани и во минатото. Преминувањето на РКС таблички го елиминира ваквиот товар и обезбедува непречена и безпредрасудна слобода на движење по целата територија на Република Косово од север на југ и од запад на исток“, кажа Курти.

На Косово во моментов како што кажа Курти има 401.945 возила со таблички РКС.

По 11 години Србија престана да издава документи за влез-излез на граѓаните на Косово, а Косово пак се согласи граѓаните на Србија да можат да преминуваат само со лични документи.

foto EPA-EFE