За работата овчар на Голема планина во словенските Алпи, објавен на интернет како би се популаризирал еколошкиот туризам, досега се јавиле веќе преку 2000 луѓе од цел свет, а двајца се во најтесен избор, изјавил водителот на тој проект Матјаж Зорман.

„Ни се јавуваат кандидати од цел свет, од САД, Австралија и други земји, доста има и наши Словенци, а најмногу се пријавиле Унгарци“, рекол Зорман за Словенската телевизија во врска со акцијата за барање кандидат за „работата од соништата“, како што се претставува работата во рекламата.

Двајца веќе во најтесниот избор, едниот Македонец

Зорман рекол дека веќе имаат двајца кандидати во најтесниот избор кои наскоро ќе ги повикаат на разговор, како би ја преземале „службата од соништата“, бидејќи се работи за тип на екстензивно сточарство при кое во почетокот на летото од шталите и заградените простори во низините животните се преместуваат во повеќе планински предели, каде тревата е погодна за испаша и во текот на летните горештини.

„Еден е Американец, милионер, кој дури понуди сам да плаќа сместување и храна како би можел да чува крави и овци, а другиот е од Македонија, сиромашно момче без образование со работно искуство“, рекол Зорман.

Работата не е за пари, но...

Тие нема да добиваат парична надокнада, туку прилика да живеат во симпатични дрвени куќички и да јадат природна храна, со можност да учествуваат во разни забавни игри и едукативни работилници.

Краткото видео-оглас на планинското одморалиште за еколошко сточарење кое е објавено на англиски јазик досега го прегледале речиси 200 000 корисници на интернет, а за него и Словенија пишуваа многу странски и домашни медиуми.