Во источна Херцеговина е пробиен тунел од 12,2 километри, дел од проектот за вода и енергија „Горњи хоризонти“, кој предвидува пренасочување на дел од водата, што би можело да доведе до поголеми еколошки последици во притоките и сливот на реката Неретва.

Тунелот, чија изградба чинеше 67 милиони евра, е дел од системот на хидроелектрани Дабар, најважниот објект во рамките на проектот „Горњи хоризонти“.

Проектот, инициран од властите во поранешна Југославија, а продолжен од Босна и Херцеговина, односно ентитетот Република Српска, вклучува изградба на два резервоари, три хидроелектрани и серија каналски тунели што ќе овозможат пренасочување на водата од сливот на Неретва кон Требишњица со цел да се зголеми хидроенергетскиот потенцијал и производството на електрична енергија.

Водата од овој систем завршува во Плат во близина на Дубровник.

Според најавите на инвеститорот, Електропривреда Република Српска, пуштањето во употреба на хидроцентралата Дабар се очекува до 2027 година.

Заедно со зголемувањето на електроенергетските капацитети, бројни еколошки здруженија и хидролошки експерти предупредуваат на бројни штетни последици.

Тие истакнуваат дека пренасочувањето на водата може да доведе до сушење на притоките на Буна, Буница и Брегава и нарушување на природната рамнотежа во сливот на Неретва.