Наскоро старите возови ќе заминат во историјата,  ќе се креира нова слика за железничкиот транспорт во Македонија.

Денеска во Кина министерот Владо Мисајловски ја имаше честа прв да го види првиот од шесте ултрамодерни возови кои ќе возат по македонските пруги.

Од кинеската корпорација CSR ќе се набавуваат четири дизел моторни гарнитури и две електромоторни гарнитури за превоз на патници во железничкиот сообраќај и оваа компанија конечно би требало да го модернизира патничкиот железнички сообраќај во земјата, а министерот Мисајловски заедно со  директорот на МЖ Транспорт Никола Костов ќе се сретнат со менаџментот на ЦСР и ќе разговараат за реализацијата на договорот.

Гарнитурите со капацитет од 1.200 патници треба да стигнат следното лето. Целосно ќе бидат климатизирани, опремени со вакуум тоалети, енергетски ефикасни и ќе ги задоволуваат сите безбедносни стандарди, како и стандардите за превоз на лица со ограничена мобилност.

Уште летово се очекува пристигнувањеето на првиот воз, а другите неколку ќе пристигаат во следните месеци, етапно еден по еден.

Лани Владата соопшти дека планира голем инвестициски циклус во Македонската железница со изградбата на пругата кон Бугарија, реконструкцијата на железницата во Скопје како и набавката на нови вагони.

Во следните четири години планирани се инвестиции од 250 милиони евра за трансформација и реорганизација на македонскиот железнички сообраќај. За набавка на нови патнички вагони предвидени се 25 милиони евра, за товарни вагони 15 милиони евра и 10 милиони евра се за рехабилитација на веќе постоечки возови, изјавија тогаш надлежните.

Она што сите ги интересира : Дали новите возови ќе ги зголемат цените во железничкиот сообраќај?

Поранешниот директор на МЖ-Транспорт Оливер Дерковски во ноември минатата година во интервју за Фактор најави дека цените за возењето со воз ќе останат исти и следната година, кога ќе стасаат новите патнички возови.

„Наредната година некаде од август ќе почнат да пристигаат новите возови кои се надевам ќе придонесат за зголемување на бројот на патници кои ќе се возат со истите цени на билетите што значи нема да има промена на цените“, рече тогаш Дерковски.