Расте бројот на жртвите и на повредените во двете моќни експлозии кои експлодираа во главниот турски град Анкара утрово. 30 лица загинаа, а 126 се повредени досега, властите продолжуваат да ги расчистуваат урнатините по експлозиите, пренесоа агенциите повикувајќи се на информации од Министерството за внатрешни работи на Турција.

Претходно турските власти го опишаа настанот како „напад“.

Местото на инцидентот е во фаза на расчистување и има засилено присуство на полиција и екипи на итна помош. Експлозиите се случија под надвозник што води кон железничката станица. Таму од утрото почнаа да се собираат активисти на синдикални здруженија и невладини организации кои планираа да одржат договорен протест со властите против конфликтот помеѓу државата и борците на Курдската работничка партија (ПКК), објави весникот „Хуриет“.

Премиерот на Турција, Ахмет Давутоглу, веќе е запознаен со деталите околу инцидентот од министерот за здравство Мехмет Моезиоглу, а подоцна во текот на денот тој треба да се сретне и со вицепремиерот Алчан Акдоган и другите членови на кабинетот.

Нападот доаѓа помалку од месец пред предвремените избори во земјата на 1 ноември и е нов бран на конфликти помеѓу властите и ПКК во последниве неколку месеци откако примирјето меѓу нив беше прекинато во јули. Од тогаш над 140 лица од турските безбедносни сили и полиција биле убиени, додека според Анкара убиените курдски борци се 1700.