Веќе со денови гимназијалците се надвор од училишните клупи и ја бојкотираат наставата.

Незадоволството кај нив и нивните родители од ден на ден се повеќе се зголемува поради игнорантскиот однос кој го покажува министерот Адеми кон нив.

Ширум земјава се бојкотира а во склоп на бојкотот се организираат и спортски активности како и петиција за поддршка на Средношколскиот Пленум.

Наставата е бојкотирана во сите скопски училишта, во Битола, Куманово, Охрид, а денес на бојкотот му се приклучија и тетовските гимназии.

Актуелниот Закон за средно образование од  месец септември  1995 година до сега има претрпено околу триесет измени и надополнувања, што според родителите и дел од експертската јавност се клучните проблеми за носење на избрзани решенија и реформи кои покрај незадоволство предизвикале и конфузија кај учениците и наставниот кадар.

Средношколците бараат да се врати стариот концепт на полагање државна матура, односно да се отфрли електронското полагање на предметите кое според нив е нефункционално, како и да се запре екстерното тестирање и да се дебатира за подобри реформи кои ќе бидат од големо значење за средношколците.