Грчкиот претставник во разговорите за разликите околу името Адамантиос Василакис, по вчерашната средба со медијаторот Метју Нимиц во Њујорк, за грчките медиуми изјавил дека единствено Грција е таа која сака спорот да се реши. „Грција сака решение, но другата страна не прави ништо досега и останува на позицијата од 1995 година“, изјавил Василакис за грчката агенција АНА-МПА. Нимиц вчера по заедничката средба со Василакис и македонскиот претставник Зоран Јолевски им порача на Македонија и Грција дека се потребни засилени напори за да се изнајде решение за деценискиот спор, а тоа е „особено важно во контекст на актуелната безбедносна ситуација во светот“. Медијаторот изрази подготвеност на почетокот на јули да ги посети двете земји.