Министерството за труд и социјална политика реагира за отвореното писмо испратено од четворица вработени до министерoт за труд и социјална политикa, Диме Спасов.

Доколу во рок од 48 часа јавно не се извините за нанесените навреди и клевети ќе поднесеме тужба согласно Законот за граѓанска одговорност за навреда и клевета, пишуваат од МТСП.

Велат дека објавеното писмо изобилува со квалификации и претставува обид за политичко конфронтирање со министерот за труд и социјална политика, што не може и не смее да биде одлика на државни службеници и долгогодишни професионалци.

„Должни сме да реагираме бидејќи со наведените манипулации се  наштетува на угледот на министерот за труд и социјална политика. Не станува збор за никаков притисок или “политички терор” врз поранешните членови на кабинетот на Фросина Ременски и ова најостро го демантираме. Министерот и лицата овластени од него постапуваат согласно законските овластувања во организирање на работата на секторите и севкупно на министерството. Од тие причини сметаме дека секој државен службеник-вработен во Министерството за труд и социјална политика кој смета дека му е повредено некакво право од работните односи има право да ги искористи правните механизми во докажување на истото во законски пропишана постапка“ - наведуваат од МТСП.

Почитувањето на законските обврски и правила не може да се нарече тортура туку владеење на право, додаваат од МТСП. Според нив, законските обврски и правила мора да се почитуваат и хаосот кој смислено се правеше во министерството изминатите 6 месеци мора да заврши.