Имунизацијата против Ковид-19 во Хрватска ќе почне во недела на 27.декември, истовремено со започнувањето на вакцинацијата и во останатите земји на ЕУ. Според премиерот Андреј Пленковиќ, првите кои ќе ја примат вакцината на Факзер и Бионтек ќе бидат штитениците во домовите за стари лица, како и здравствените работници.

Првите 9.750 дози ќе пристигнат во земјата задутре, еден ден по Божик, а Пленковиќ изјави дека вакцината е бесплатна и е на доброволна основа.

-Сакаме што повеќе граѓани да се вакцинираат. Пред нас е аргументирана расправа што повеќе луѓе да одлучат да се вакцинираат. Целта е да се вакцинираат најмалку 70% од граѓаните, а досега се обезбедени скоро шест милиони дози од вакцината, изјави хрватскиот премиер.

Освен еден милион дози од вакцината на Фајзер и Бионтек, Хрватска набави и 2,7 милиони од Астра Зенека, 900.000 дози од Џонсон& Џонсон, еден милион дози од Модерна и 300.000 од Кјурвак.