Понеделник ќе биде Ден на жалост во Косово. 

Претседателката на Косово Вјоса Османи го прогласи утрешниот ден за ден на жалост во државата, во знак на почит за граѓаните на Република Косово кои го загубија животот во тешката сообраќајна несреќа што се случи утрово во Хрватска, јави дописникот на МИА од Приштина.

Во соопштението од претседателскиот кабинет се наведува дека по несреќата, во која животот го загубија десетмина косовски печалбари во Германија, Османи ќе ја прекине посетата на Јапонија, каде што престојува по повод Олимписките игри, и утре ќе се врати во земјата.

Приведен e возачот на автобусот oд Косово кој се преврте кај Славонски Брод во Хрватска, бидејќи признал дека задремал на воланот. 

Обвинителството констатира дека автобусот од Приштина кој патувал од Франкфурт за Приштина, излетал на тревнатата банкина на јужната страна од коловозот.