Регулаторната комисија за енергетика, согласно востановената пракса, утре треба да ги објави новите цени на нафтените деривати. Со последната одлука пред две недели, цените на бензинот и дизелот се зголемија за 0,5 денари. Така во моментов малопродажна цена на ЕУРОСУПЕР БС-95 изнесува 78, а ЕУРОСУПЕР БС-98 се продава за 79.5 денари за литар. ЕУРОДИЗЕЛ (Д-Е V) чини 69, додека Екстра лесното масло за домаќинство (ЕЛ-1) 58 денари за литар. Новата цена на нафтените деривати, која ќе важи од утре на полноќ, ќе се формира во зависност од просечната цена на суровата нафта на светските берзи во тековниот 14 дневен период како и според односот на курсот на доларот и денарот. Цената на суровата нафта во изминатите две недели растеше, како резултат на ниските температури во САД, кои ја зголемија побарувачката на масло за домаќинство, но и заради блокадата на пристаништата во Либија која предизвика намалување на испораките на нафта за 600 илјади барели дневно.