Граѓанската организација ,,АЈДЕ” ги повикува сите граѓани да дојдат на јавниот собир утре во 18 часот пред Собранието на Република Македонија  за да му изразат поддршка на специјалниот обвинител, но и да му ги кажат нивните очекувања. Утре е краен рок за избор на специјалниот јавен обвинител, а граѓаните ќе го пречекаат со мотото на собирот ,, Обвинителе многу работа ве чека”. ,,Ние, граѓаните на Република Македонија целосно сме посветени и истрајни во битката за правда, слобода и демократија. Ова треба да му биде јасно на специјалниот јавен обвинител. Непоколебливо и цврсто ќе ја поддржиме неговата работа, зашто очекуваме премиерот во оставка и неговите соработници, што побрзо да се најдат на обвинителна клупа и да одговараат за сите криминали и злосторства направени во изминатите девет години” стои во повикот од АЈДЕ. Од организацијата велат дека очекуваат Специјалниот јавен обвинител и неговиот тим, да работат целосно независно, професионално, компетентно и ефикасно и да ги процесираат во најкус можен рок криминалите на власта. -Оваа власт мора да одговара за своите криминали и злосторства и тоа претставува врвен национален интерес! НЕМА ПРАВДА – НЕМА МИР!, стои во јавниот повик за граѓанскиот собир. Преговорите меѓу работните групи за специјален обвинител се уште траат и неизвесно е дали ќе се испочитува рокот. Специјалниот обвинител ќе треба да работи на аферата ,,Прислушување” и случајот ,,Пуч”.