Турција е заинтересирана за приклучување кон Единствената евро платежна зона (SEPA), а надлежните финансиски институции веќе работат на ова прашање, изјави денес турскиот министер за надворешни работи Хакан Фидан.

Тој го изјави ова како одговор на новинарско прашање за разговорите што ги одржа во Анкара во вторник со високата претставничка на Европската Унија за надворешни работи и безбедносна политика Каја Калас и двајца европски комесари, пренесува Ројтерс.

Турција и Европската Унија веќе разговараат за можното вклучување на таа земја во системот SEPA, кој обединува 41 земја и овозможува побрзи, поевтини и побезбедни прекугранични плаќања во евра.

Единствената зона за плаќања во евра (SEPA) беше основана за да се поедностават безготовинските плаќања во евра меѓу земјите-членки.

Покрај земјите од Европската Унија, системот вклучува неколку земји кои не се членки на Европската Унија, како што е Србија, која стана 41-ва членка на SEPA во мај 2025 година.