11 Октомври Еурокомпозит, фабриката чиј акциоонер-сопственик беше Владата а сега е во стечај, е пред преземање од странски инвеститор за кого нема многу информации што може да се потврдат.

Основниот суд Прилеп на 5 декември донел решение со кое му е одобрен планот на заинтересираниот купувач за реорганизација на фабриката која може да произведува воена и полициска опрема, а има и цивилна линија.

Планот е изготвен од „доверителот инвеститорот“ Футура Мода Д&А ДООЕЛ-Скопје како фирма посредник за која нема никакви јавни информации, како и FHR Armorl Logistics, непозната компанија за која е наведено само тоа дека е од Полска.

Изминатата пролет фабриката за шински возила „Колска“ од Велес, уште еден загубар кој претходно беше во сопственост на Владата,  од април годинава официјално доби нов сопственик - „Трени Балцани Оццидентали“ на бизнисменот Ѓорге Трајанов од Василево, зад кого стои италијанска компанија за шински возила. Претходно беше прифатен планот за реорганизација поднесен до велешкиот суд за реорганизација и подмирување на доверителите, поднесен на 15 јануари годинава.

Последните информации се дека компанијата за производство на наменска опрема има долг од неколку милиони евра, а актуелен стечаен управник е Љубица Зајкоска, која не одговори на нашите повици за изјава.

Еурокомпозит беше трансформирана во акционерско друштво со капитал 100 отсто во сопственост на државата во 90-те години кога имаше 550 вработени. Програмата на Еурокомпозит е поделена на две главни гранки: воена и полициска опрема и цивилна линија. Имаше широка палета производи – од балистички шлемови, елеци и плочи до рачни ракетни лансери; како и електро изолациони материјали. 

А.К.