Управувачкиот комитет вечерва треба да донесе одлука што понатаму со бегалците кои останаа „заглавени“  на наша територија, откако е затворена балканската рута. Повеќе министри треба да ги прецизираат понатамошните чекори со кризата и што ќе биде со 1500 бегалци кои останаа во Македонија. Во меѓузоната има 437 бегалци, државјани на Сирија и Ирак кои не сакаат да влезат во Транзитниот центар во Табановце , каде се згрижени 1050 бегалци. Меѓу нив има голем број деца и жени кои се на отворено, изложени на временските неприлики. Тие се наоѓаат на 500 метри од кампот Табановце. Србија ја затвори границата, истото го направи и Хрватска, откако Словенија започна да го применува новиот режим за влез на бегалците во Шенген зоната.