Украина ја повика Србија „веднаш да преземе мерки“ за да ја запре руската пропаганда и регрутирањето на доброволци во војна преку огласи.

Приватната воена компанија „Вагнер“ на рускиот бизнисмен Евгениј Пригожин објави оглас за волонтери, преку порталот RT Balkan.rs, кој неодамна започна со работа во Србија.

Амбасадата на Украина оценува дека руските државни информативни канали на тој начин дејствуваат спротивно на српските закони, „обидувајќи се да го пополнат дефицитот од сопствениот материјал за топовско месо со српски државјани за агресија врз суверената европска држава Украина“.

Од 2015 година во Србија е во сила закон кој им забранува на српските државјани да одат на странски боишта. Предвидени се казни за поединечно и групно заминување и за оние кои „регрутираат или поттикнуваат“ други да одат на странски боишта.

„Исто така, повикуваме на итна забрана за активностите на Раша Тудеј, кој е антисрпски. Повикуваме да се изведат пред лицето на правдата сите оние кои и помагаат на Москва во извршувањето на оваа незаконска активност“, се вели во соопштението на амбасадата.

Се додава дека „Србите добро знаат дека илјадници руски граѓани бегаат од ксенофобичната политика на актуелниот режим на Кремљ, вклучително и во Србија“ и дека Москва се сврте кон Србија пред „тешките загуби“.

„Амбасадата на Украина ги поздравува сигналите на претседателот на Србија Александар Вучиќ до руската страна за недозволивоста на ваквите дејствија. Во овој контекст, логично продолжување на ставот на шефот на државата е одлуката на Министерството за одбрана на Република Србија, најавена од министерот Милош Вучевиќ, да им забрани на српските државјани учество во воени операции во Украина и задолжително казнување за овој прекршок согласно српските закони“, се наведува во соопштението.