Директорката на Управата за јавни приходи, Сања Лукаревска, денеска брифираше пред медиумите дека три компании од липковско-кумановскиот регион пробале да исцрпуваат пари од државата со фиктивни фактури за поврат на ДДВ преку мрежа на бензински пумпи.

Се регистрирале дека извршуваат дејност продажба на нафтени деревати, а немале ниту лиценци, ниту вработени. Како што започнала акцијата на УЈП, така се менувало сопствеништвото на фирмите, криејќи се зад косовски и хрватски државјани. Нивната работа била добро искоординирана со заедничко сметководствено биро.

Обидот од државата да се одземат 160.117.122 денари бил осуетен од УЈП и спречен. Кога почнале контролите од УЈП, почнале и промените на сопственичките структури на трите фирми. Како што влегувале инспекторите, така македонските државјани, фирмите ги префрлиле на хрватски и косовски државјани. Дека помеѓу сите три фирми имало поврзаност, покажува фактот што фирма која злоупотребувала податоци од добавувач и злоупотребениот добавувач имале исто сметководствено било.

„Во сите случаи има меѓусебна поврзаност од различни аспекти. Упатува на тоа дека е однапред смислена шема, со цел изигрување на законот и стекнување на противправна имотна корист. Од доказите се доставени до истражните органи согласно нивните надлежности. УЈП има доставено писмена пријава до ОЈО и МВР на 15.11.2023 година“, рече Лукаревска.

Кај ниту еден од случаите, поврат не бил одобрен.