Автобус со ученици e каменуван во црногорскиот град Цетиње затоа што играле српско оро. Црногорците ова го доживеале како провокација. 

Автобус пренесувал ученици од Никшиќ на екскурзија и е нападнат по посетата на Цетинскиот манастир, јавуваат црногорските медиуми. Возачот М.З. го пријавил случајот во полиција. 

Во соопштението на Група граѓани од Цетиње се наведува дека причина за инцидентот е играње оро со песната „Весели се, српски Роду“.

„Почитувани „туристи“ од Црна Гора и вие од околните земји, Ви се обраќаме по вашето пристигнување во Цетиње. Се надеваме дека случајно дојдовте на датумот кога српските жандарми запалија две жени и пет деца од семејството Звицер и во време кога Цетињци му даваа поддршка на нападнатиот украински народ“, се вели во соопштението.

Во него се додава дека тие го виделе орото играно од туристите како „четничко оро со свештениците на Српската црква, кои ја гледаат Црна Гора како мала Украина, повикувајќи на зло, уништување, терор, страдање и смрт – само плод на вашето непромислено заведување од идеологијата на узурпаторот на Цетинскиот манастир“.

Од црногорското министерство за правда, човекови и малцински права го осудија нападот.

„Сите оние кои се залагаат Црна Гора да биде слободна, мултинационална и мултиконфесионална држава во вистинска смисла на зборот, мора да бидат подготвени да го осудат таквиот чин“, соопштија од Министерството.