По паузата која траеше две недели денеска од грчкиот остров Лезбос кон Турција тргна нова група мигранти.

Согласно информациите од пристаништето во Мителини турски брод качил 45 Пакистанци, а до крајот на денот треба да бидат пренесени вкупно 150 лица, соопштуваат германски медиуми.

Десетици активисти демонстрираа несогласување со договорот помеѓу Брисел и Анкара, скокајќи во водите во знак на протест против враќањето на мигрантите.

Во меѓувреме, турските власти објавија дека ќе изградат три нови бегалски кампови за Сиријци во југоисточниот дел на Хатај и Кахраманмараш, пишува агенцијата Анадолија.

Во новите центри ќе има медицински центри, училишта, центри за рехабилитација и џамии, изјави шефот на Канцеларијата за бегалските кампови Ергун Туран.