Претседателот Ѓорге Иванов се сретна со турски стопанственици од регионот Коџаели, на маргините на 16 Евроазиски економски самит денеска во Истанбул. На средбата инаку учествуваа и бизнисмени со потекло од Македонија, а биле презентирани поволностите за инвестирање во Република Македонија, како и економските и туристичките можности на земјата. Како што информираше МИА турските стопанственици изразиле заинтересираност за инвестирање во Република Македонија, а станало збор и за конкретни инвестиции во земјава. Исто така, турските стопанственици упатиле покана до претседателот Иванов да ги посети во Коџаели. Коџаели е регион каде живеат 1,6 милиони жители и се реализира 13 отсто од севкупното турско производство. Оттаму се собираат 13 отсто од вкупните даноци во Турција. Во Коџаели функционираат 13 индустриски зони, две слободни економски зони и три технолошки паркови. Регионот има 34 пристаништа од каде се транспортираат 65 милиони тони стока годишно, со што е на осмо место во Европа. Од 500-те најголеми компании во Турција, 92 се од Коџаели. Годишно компаниите од овој регион извезуваат стоки во вредност од 17 милијарди евра.