Турција ќе мора да му плати 90 милиони евра отштета на Кипар заради инвазијата во 1974 година и поделбата на островот, одлучи Европскиот суд за човекови права. Од вкупната сума, 30 милиони евра Турција ќе треба да им исплати на семејствата на исчезнатите во воените операции, а 60 милиони евра како отштета на грчкото етничко население на полуостровот Карпас, кое по инвазијата остана во енклавата. По турската инвазија, островот Кипар до денес е поделен на два дела - северен и јужен. Јужниот дел на островот, познат како Република Кипар, е член на Европската унија од 2004 година. Северниот дел на Кипар, пак, е признаен како посебна држава само од Турција. Лидерите на кипарските Грци и Турци во февруари годинава, по 20 месечна пауза ги продолжија преговорите за обединување на Кипар, со надеж дека е можно решение до крајот на годинава.