Владата на Црна Гора денеска усвои нов пакет мерки за штедење, што предвидува намалување на платите на пратениците и службениците во регулаторните агенции и државни претпријатија, замрзнување на пензиите и воведување кризен данок на платите, пренесе Танјуг.

Министерот за финансии Радое Жугиќ на прес конференција соопшти дека со новиот пакет мерки Владата очекува да заштеди околу 30 милиони евра.

Тој изјави дека кабинетот побарал од парламентот да ги намали платите на пратениците за седум проценти, со колку беа намалени и министерските плати.

Просечната плата на пратеник во Црна Гора изнесува околу 1.300 евра, а просечната плата во земјата е 478 евра.

Жугиќ додаде дека во новиот пакет мерки е предвидено и намалување на платите на администрацијата, на регулаторните агенции и на претпријатијата во кои државата е мнозински сопственик.

Извршните директори во овие претпријатија ќе можат да добиваат најмногу две просечни плати во државата, претседателите на бордови од директори до една плата, а членовите на бордови до 50 проценти од просечната плата.

Владата одлучила да воведе и кризен данок од три процента, со кои ќе се оптоваруваат сите бруто плати над 400 евра. Овој данок ќе важи и за приватните фирми.

Пензиите ќе бидат замрзнати на сегашното ниво, но за пензионерите со најмали пензии се предвидени еднократна помош и помош за решавање на станбените проблеми.

Пакетот мерки за штедење ќе важи целата следна година, а потоа ќе биде направена анализа и Владата ќе одлучи дали да остане во сила или ќе биде повлечен, рече министерот за финансии.