Новиот директор на Клиничкиот центар на Црна Гора, Ранко Лазовиќ изјавил дека во иднина ќе се пријавува само бројот на новородени деца, но не и нивниот пол, бидејќи според него тоа е дискриминација, пренесе „Танјуг“.

„Секаде во светот е задолжително да се пријави бројот на новороденчињата и ништо повеќе. Сметам дека децата од машки и женски пол се целосно исти, имаат ист статус и за тоа не треба да има дискриминација за пол“, истакнал Лазовиќ.

Иако граѓанското здружение „Родители“, вели дека не е јасно зошто тоа е дискриминација, социолозите ја поздравиле одлуката на Лазовиќ.

Црна Гора заедно со Албанија, Азербејџан и Ерменија, е земја со најголем дисбаланс меѓу децата од машки и женски пол.

Статистиката покажува дека во Црна Гора се раѓаат 100 девојки на 110 момчиња, додека природниот баланс е 100 девојки на 102 - 104 момчиња.