Владата на Република Србија од утре прогласи тридневна жалост во земјата заради жртвите на катастрофалните поплави кои ја зафатија земјата. „За денови на жалост ги прогласуваме 21, 22 и 23 мај“, објави српскиот премиер Александар Вучиќ. Само во Обреновац, има 14 жртви во поплавите од кои половината се удавиле во надојдените води. Евакуацијата во Обреновац траеше и во текот на ноќта, а извлечени беа уште над 1.200 жители. Земјата и натаму е во вонредна состојба, подготвувајќи се да го пречека новиот поплавен бран. Од утрово е регистрирано зголемување на водостојот на Дунав. Во Босна и Херцеговина денеска е прогласен ден на жалост за поплавите кои и таму однесоа човечки животи.