Трендафилов на првомајскиот протест: Работници не се враќаат дома и никој ништо не презема
Сојузот на синдикати на Македонија денеска организира[e протест по повод Меѓународниот ден на трудот под мотото „За плата се бориме – не се молиме“, со главно барање за зголемување на платите.
Од ССМ порачаа дека работниците треба гласно да го искажат незадоволството, нагласувајќи дека минималната плата не ги покрива основните трошоци за живот. Тие бараат минималецот да достигне 600 евра и раст на сите останати плати.
И покрај притисоците, минималната плата во март беше зголемена за 1.660 денари, додека инфлацијата и трошоците за живот продолжуваат да растат. Синдикатот најавува дека ќе продолжи со притисок врз институциите за подобрување на стандардот.
Протестот започна пред Работничкиот дом во Скопје. Голем број работници, синдикалци и граѓани се собраа со барања за повисоки плати, подобри услови за работа и поголема заштита на работничките права. Протестниот марш продолжи кон Владата на Република Македонија, каде демонстрантите ги испратија своите пораки до институциите.
Низ толпата се истакнуваа бројни транспаренти со силни пораки: „За плата се бориме, не се молиме“, „Работниците го хранат капитализмот – тие ќе го срушат“, „Долу капиталот, ослободување на трудот“ и „Власта – слуга на капиталот“.
Претседателот на ССМ, Слободан Трендафилов на почетокот на маршот рече дека за жал имаме квази синдикати кои сметаат дека не треба да се протестира, кои сметаат дека 1 мај е за луксуз во скап хотел на скапа конференција.
„За жал, голем број работници денес гинат на своите работни места. Наутро заминуваат на работа, а навечер не се враќаат. И никој не презема ништо за нивна заштита“ , кажа Трендафилов.
На крајот од обраќањето на протестот, претседателот на ССМ, Слободан Трендафилов, им порача на сите работници кои денес се на работа дека нивниот труд на Први мај треба да биде платен 250 проценти, нагласувајќи дека, доколку тоа не се испочитува, да се обратат до Сојузот на синдикатите на Македонија.
Слично
Поврзани вести
