Министерката за труд и социјална политика, Јована Тренчевска, во изјава за МИА рече дека Економско-социјалниот совет во понеделник на седница ќе ја носи одлуката за висината на минималната плата.

- Одлуката за висината на минималната плата се носи токму на Економско-социјалниот совет, потоа се објавува во Службен весник, за да може работодавачите да ги усогласат платите кои ќе ги исплатат за месец март со одлуката, односно со висината на минималната плата, вели Тренчевска во видео изјава дадена во прес-центарот на МИА во Штип.

Зголемувањето на минималната плата ќе биде за 12,55 отсто, односно истата од месец март ќе изнесува 20.175 денари, објави претходно Владата. Ова значи дека граѓаните добиваат повисоки плати за над 2000 денари.

Со измените на законот за минимална плата, донесени во март 2022 година, се воспостави нова методологија, која е системско решение и кое значи постојан раст на минималната плата.

Секоја година во месец март минималната плата  се усогласува согласно податоците од Државниот завод за статистика, и тоа 50 отсто од порастот на  трошоците за живот и 50 отсто од порастот на просечната плата од измината година.