Американскиот претседател Доналд Трамп изјави дека САД би можеле „лесно“ да го отворат Ормускиот теснец, потег што, според него, би донел значителни економски придобивки.

„Со уште малку време, лесно можеме да го отвориме Ормускиот теснец, да ја земеме нафтата и да се збогатиме. Тоа би била голема добивка за светот“, напиша Трамп на платформата Truth Social.

Ормускиот теснец е клучна енергетска рута преку која вообичаено се транспортира околу една петтина од светската нафта и течен природен гас.

Сепак, од почетокот на конфликтот со Иран кон крајот на февруари, поморскиот сообраќај низ теснецот е значително нарушен. Блокадата доведе до остар раст на цените на нафтата и сериозни потреси на глобалните пазари.

Во моментов, низ теснецот минуваат само ограничен број бродови, главно од Иран, Обединетите Арапски Емирати, Индија, Кина и Саудиска Арабија.

Според податоците на аналитичката компанија Kpler, од почетокот на март низ теснецот поминале 225 товарни бродови, што е пад од дури 93 проценти во споредба со периодот пред конфликтот.