Вчера, американските државни обврзници (трезорски обврзници) беа на продажба. Приносите се искачија на највисоко ниво за повеќе од четири месеци, бидејќи пазарите беа зафатени од страв од сценарио „Продај ја Америка“ поради најновите геополитички тензии. Индексот на американскиот долар, исто така, ослабе.

„Европа го поседува Гренланд, но поседува и голем дел од американските државни обврзници“, напиша Џорџ Саравелос, глобален раководител на одделот за истражување на валути во Дојче банк, во белешка од неделата. Таа изложеност укажува на клучна ранливост за САД, кои во голема мера се потпираат на странски инвеститори за финансирање на својот долг.

Европските земји поседуваат околу 8 трилиони долари во американски обврзници и акции - речиси двојно повеќе од остатокот од светот заедно, според „Дојче банк“, пишува „Бизнис инсајдер“.

„И покрај својата воена и економска сила, САД имаат една клучна слабост: се потпираат на другите да ги платат своите сметки преку големи надворешни дефицити“, додаде Саравелос. Тој потсети дека минатата година данските пензиски фондови беа меѓу првите што го вратија капиталот и ја намалија изложеноста на доларот како одговор на неизвесноста околу политиките на Трамп. Саравелос, исто така, предупреди дека изложеноста на доларот низ цела Европа останува висока.

„Во средина каде што геоекономската стабилност на западниот сојуз е егзистенцијално поткопана, не е јасно зошто Европејците би биле спремни да продолжат да ја играат таа улога“, рече Саравелос.

Освен валутите, Саравелос верува дека вистинскиот ризик лежи на пазарите на капитал, бидејќи САД се поранливи на странските инвеститори од кога било досега. „Вооружувањето на капиталот, а не на трговските текови, би било убедливо најреволуционерно за пазарите“, напиша тој.

Според Крис Вестон, директор за истражување во „Пеперстоун“, тој ризик веќе почнува да се проценува.

„Динамиката на пазарот за која гледаме сè повеќе докази е дека американските средства (вклучувајќи го и доларот) сега носат значително повисока премија за политички ризик“, напиша Вестон во понеделник. Таа промена би можела да ги поттикне странските инвеститори да ја намалат својата изложеност на САД и да ги прилагодат своите вложувања во доларски ризик, што би влијаело врз валутата и би го поттикнало растот во безбедните засолништа како златото, додаде тој.

Вчера, американскиот министер за финансии Скот Бесант ги отфрли шпекулациите на пазарот дека Европа би можела да продаде американски средства како одмазда за заканата на Трамп за царини на Гренланд.

„Во европските влади нема разговор“, изјави Бесент пред новинарите на Светскиот економски форум во Давос, нарекувајќи ги таквите тврдења „целосно лажен наратив“. „Тоа е спротивно на секоја логика и јас силно не се согласувам со тоа“.