Американскиот претседател Доналд Трамп ѝ одобри на „Nvidia“ да испорачува чиповиза вештачка интелигенција во Кина, во замена за надоместок од 25 отсто — потег што  ѝ  овозможува на највредната компанија во светот потенцијално да поврати милијарди долари изгубен бизнис од еден од клучните светски пазари. 

Одлуката ја објави Трамп на неговата мрежа „Трут Соушал“, ставајќи крај на неделите консултации со советниците за тоа дали да се дозволи извозот во Кина. Трамп изјави дека го информирал кинескиот претседател, а тој реагирал позитивно. Додаде и дека испораките ќе одат само кај „одобрени клиенти“, и дека производителите на чипови како „Интел“ (Intel Corp.) и „АМД“ (Advanced Micro Devices Inc.) исто така би можеле да добијат одобрение.  

Потегот претставува победа за компанијата во нејзините напори да го убеди Трамп и Конгресот да ги ублажат извозните контроли кои ѝ го попречуваа пристапот да ги продава своите чипови за ВИ на најголемиот полупроводнички пазар во светот. 

Главниот извршен директор Џенсен Хуанг изгради блиска релација со Трамп по изборите во ноември 2024 година и ги искористи тие контакти за да го истакне својот став дека ограничувањата само ги зајакнуваат кинеските домашни шампиони како „Хуавеи“ (Huawei Technologies Co.).