Глобалните промени на пазарот на труд, забрзаната дигитализација и растечките потреби во логистиката, здравството и технологијата доведуваат до тоа одредени професии да се издвојат како клучни во наредниот период. Експертите проценуваат дека побарувачката за овие профили ќе продолжи да расте, без разлика на економските осцилации.

На врвот на листата се ИТ-стручњаците и софтверските инженери. Програмери, експерти за сајбер-безбедност и вештачка интелигенција се меѓу најбараните кадри, бидејќи дигиталната трансформација создава постојана потреба од развој и одржување на системи.

Голема побарувачка има и во здравствениот сектор. Медицинските сестри, техничари и негуватели стануваат сè побарани поради стареењето на населението, а здравството останува еден од најстабилните сектори за вработување.

Логистиката е уште една област во подем. Порастот на онлајн трговијата доведе до експанзија на дистрибуцијата, па возачи, магационери и работници во синџирите на снабдување се клучни за функционирањето на економијата.

Недостиг има и во градежништвото. Ѕидари, електричари, водоинсталатери и други занаетчии се барани, особено во развиените европски земји, каде дел од работната сила заминува во пензија.

Сè поголемо значење добиваат и стручњаците за обновливи извори на енергија. Инженери и техничари во соларната и ветерната енергија се барани поради глобалниот премин кон „зелена“ енергија и намалување на зависноста од фосилни горива.

Овие професии се очекува да бидат меѓу најсигурните избори за вработување во годините што следуваат.