Во Македонија текстилните работници работат прекувремено, за што обично не добиваат надомест.

За нив работниот ден многу често трае и повеќе од 8 часа.  Ова е сериозен проблем и истото трае подолго време. На повеќе од 70% од текстилните работници во градовите од Источна Македонија не им е платена прекувремената работа, покажа анализата направена во рамките на проектот ,,Создади мрежа на знаење-препознај и пријави прекршување права“ кој го спроведува Здружението ,,Гласен текстилец“

На анкетниот прашалник одговориле 870 испитаници од кои 708 жени и 172 мажи. Тие го кажале својот став на вкупно 26  прашања, поврзани со користењето и плаќањето на годишните одмори, исплатите на к-15, колку платите ги задоволуваат нивните потреби, дали имаат подигнато кредити, како ги исплаќаат, за дискриминацијата, притисоците на работа.

„Прекувремената работа е дефинирана и во Законот за работни односи и во колективните договори во врска колку таа смее да изнесува, колку е платена и слично. Прекувремена работа е сѐ она што е над 40 часа неделно, и истото треба да е платено за 30%“, вели Кристина Ампева од „Гласен текстилец“.

Луѓето кои долги години се во оваа струка имаат различни искуства.

„Сум работела во повеќе фирми, и секаде било различно, зависи од газдите. Некаде плаќале за прекувремена работа, а некаде не. Луѓето си зборуваат меѓу себе, но не реагираат кај газдите. Јас сум била бунтовник, сум барала да се плати. Ако молчиш ништо нема да добиеш. Стравот е многу лоша работа. Што ќе изгубат дури и ако ги избркаат од работа? Ќе најдат иста, а можеби и подобра работа. Додека молчев бев потценета и несреќна. Секој мора да си ја цени својата способност“, вели Фросина Митевска, текстилна работничка.

Освен анализата којашто е изработена во рамките на проектот ,,Стратешко партнерство за промени на Здружението ,,Отворена порта“, се нудат и решенија коишто се однесуваат на работата којашто треба да ја работат надлежните институции на пример околу прекувремената работа.