Битолскиот градоначалник Владимир Талески осомничен во случајот „Транспортер“,  втор ден е во куќен притвор, а полицијата прави ненајавени посети за да провери дали е дома.

Од вчера и формално се спроведува решението на Кривичниот суд за куќен притвор од 30 дена. Талески веќе два дена не оди на работа, а денеска советниците од општина Битола од партијата ВМРО -ДПМНЕ имаа координација и се очекува да се договорат кој ќе го заменува Талески додека е во куќен притвор.

Во меѓувреме, иако уште вчера беше најавено дека предметот за градоначалникот Талески, ќе биде пратен во Апелациониот суд, денеска од Кривичниот суд велат дека предметот сè уште не е комплетиран.

„Се чекаат доставници од битолската полиција за да се доуреди предметот. Потребно е Судот да добие доказ дека обвинетиот го добил решението на Судот и дека и СВР Битола го добил решението“- одговараат од Судот.

Талески и уште 22 лица опфатени во предметот „Транспортер“ и  се осомничени дека го оштетиле Буџетот на Република Македонија за 360.000 евра поради незаконско организирање на училишниот транспорт.