Градоначалникот на Битола, Владимир Талески изјави дека општината нема направено никакво незаконско дело, ниту е вмешана во криминал.

Тој попладнево на прес-конференција го појасни процесот на организирање на бесплатниот превоз за ученици. Според него, денешната прес-конференција на СЈО е со политички побуди.

“Општина Битола доби надлежност да спроведе групна јавна набавка за организирање бесплатен превоз на ученици и таа ја извршивме со согласност на сите директори на училиштата. Согласно Закон, до општината доаѓаат блок дотации, општината ги трансферира до училиштата, а училиштата врз основа на потпишан договор со превозниците вршат плаќање на услугата и тука нема ништо спорно. Со денешната прес-конференција на СЈО воочивме дека оваа институција бескрајно многу не уважува како важен субјект“ - рече Талески.

Тој е категоричен дека во општината се работи законски и не му е потребна аболиција.