Премиерката на Србија, Ана Брнабиќ денеска изјави дека во српскиот буџет има доволно средства за исплата на договорените субвенции за земјоделците и дека засега нема да има поскапување на сончогледовото масло.

Брнабиќ рече дека веста за поскапувањето на нафтата ја пренесуваат „тајкунските медиуми“, незадоволни од успешните договори меѓу Владата и претставниците на земјоделските производители.

Таа им се заблагодари на земјоделците за соработката и подготвеноста за договор и ги потсети на резултатите од тие средби.

- Не ги исполнивме сите барања, бидејќи никогаш не може да ги исполниме сите барања, но најдовме компромис, а тоа е цената на сончогледот од 73 динари за килограм - изјави премиерката за ТВ Прва, пренесува „Информер“.

Таа посочи дека се договорени и дополнителни субвенции за гориво од 20 динари за 50 литри, со цел да се намалат производствените трошоци за земјоделските производители.

Таа наведе и дека премијата за млеко ќе биде покачена од 10 на 15 динари, која ќе важи за еден квартал во 2022 година, кога повторно ќе се преговара со млекопроизводителите и сточарите.

Брнабиќ оцени дека договорите со земјоделците обезбедиле единство и внатрешна стабилност пред исклучително тешките разговори на претседателот Александар Вучиќ во Брисел.

Таа објасни дека лично барала од земјоделците да разговараат цела ноќ и во рекордно време да се дојде до решение, за некој од странство да не ги злоупотребува за дестабилизација на државата.