Бугарската економија демонстрира неверојатна издржливост, вели Тони Томпсон, претставник на Светската банка за Бугарија, Чешка и Словачка.

„Сведоци сме на тоа дека голем број компании се натпреваруваат на пазарот не само во Бугарија, туку и во Европската унија и успеваат против светски лидери, што е добра вест. Невработеноста се намалува. Речиси нема инфлација, фискалната потрошувачка е одлична, дефицитот исто така се намалува и Бугарија продолжува да има едни од најниските стапки помеѓу БДП и долг во Европската унија. Тоа се навистина добри вести, знам дека не е многу типично за Бугарите да признаат дека во нивната земја се случува и нешто убаво, но јас сакам да верувам дека тоа е така "- истакна Томпсон.

За Светската банка почитувањето на правилата е исклучително важно за регионалната, европската и светската економија.

„Во Бугарија големите градови напредуваат, а кога зборувам со градоначалниците на Софија или на Бургас тие велат: економијата ни оди, немаме невработеност и секој ден има нови инвестиции. Но, ако одите во малите општини, тогаш сфаќате дека таму работите не се менуваат, па дури и во некои случаи се влошуваат. Тие заостануваат "- коментира тој.

Тој истакна дека 80% од патната мрежа во Бугарија се од втора или трета класа патишта.

„За нив е постигнат напредок, па работите се подобруваат и тоа не може да се негира"- истакна Томпсон.

Додаде дека има патишта кои не се поправени цели  20 години. Според него и во иднина подобрувањето на патната мрежа ќе биде важен чекор за развојот на бугарската економија како целина и економијата на регионите.