Еден од најголемите приватни универзитети „Американ Колеџ“ ја купи соседната зграда до своето седиште на „Трета Македонска Бригада“, булеварот што се наоѓа помеѓу Кисела Вода и Аеродром во Скопје.

Приватниот универзитет е нов сопственик откако изминатите денови ја купи фирмата МЗТ Инвестмент Гроуп, чии сопственици досега по половина беа М-6 Инвестиции на Светозар Јаневски, како и Дарко Гелев-Брејк.

Гелев ја потврди купопродажбата за „Фактор“, но вели дека добиената сума останува деловна тајна. Тој вели дека решиле да го искористат моментот на добрата понуда.

- Ова зграда е една од оние што порано ги поседуваше „Металски Завод Тито“ - Скопје. Ние ја купивме пред 20 години, а основна дејност на МЗТ Инвестмент Гроуп беше издавање на деловниот простор. Во моментот кога видовме дека понудата од „Американ Колеџ“ е поволна, ние решивме да ја продадеме, вели Гелев.

„Зделката“ ја потврди и Јаневски, еден од најпознатите менаџери во земјата и доминантен сопственик на ВВ „Тиквеш“, но ни рече дека е во странство и дека нема време да изнесува детали.

„Американ Колеџ“ е во сопственост на друштвото за менаџмент АКС „Менаџмент од Скопје“ и е еден од трите најголеми приватни универзитети во земјата, заедно со ФОН Универзитет и Европски универзитет.

МЗТ Инвестмент Гроуп од друга страна е фирма основана во 2004, со релативно мали годишни приходи, но со вкупна актива од околу 500.000 евра.

А.К.