Жалбите на СЈО за отфрлање на барањата за притвор на екс министерот за транспорт и врски Миле Јанакиески,  градоначалникот на Пустец Едмонд Темелко и уште две лица вчера беа одбиени од страна на Кривичниот совет.

Денеска судот треба да одлучи за притворот на екс министерката за внатрешни работи Јанкулоска.

Се чека одлуката и за жалбите на СЈО за одбиениот притвор на судот за генералниот секретар на Владата Кирил Божиновски, за Исмет Гури од изборната комисија на Чаир и уште двајца осомничени од општинските изборни комисии.

Колку е непристрасно судството? Судиите и поранешните обвинители за ова прашање се поделени.

„Во Судството се гнездата на отпорот против криминалот и ерозијата на правдата. Тоа е рак-рана  во македонското општество што  е забележано и во извештајот на Прибе. Ќе следи болен рез и затоа  верувам дека следува операција за отстранување на метастазите – вели актуелниот адвокат Стеван Павлески.

Поранешниот Јавен обвинител кој беше и  шеф на Државна безбедност во времето на министрите Трпеновски и Јордан Мијалков оценува дека сегашните  судии ја  плаќаат  фактурата што им ја испорачуваат моќниците од власта – „тоа што ние ви го дадовме како награда ќе си  го одработите според инструкциите кои ќе ги добиете “, изјави во интервју за Фактор неодамна Павлески .

Тој посочи дека „Се настојува да се обезвредни се’ што е поврзано со  сомневањaта  за сторени  противзаконски дејствија од  страна на  претставници на  власта и да остане нивната аура на патриоти, на  “вистински Македонци“,  а не како што тврди Специјалната обвинителка дека станува збор за гангстерски начин на владеење“.

„Се надевам дека судиите ќе сфатат дека од исклучителна важност е доследно да ги применуваат  законите без разлика кој е  прекршителот и каква  функција извршува.  Потребна е професионална, независна и непристрасна истрага  за да  може да ја извлечеме земјата од длабоката криза во која се наоаѓа подолг временски период“, рече адвокатот Александар Тортевски исто така во неодамнешна изјава за Фактор.