Собранието ги усвои измените на Кривичниот законик кои треба да ги отстранат можностите, причините или условите за доведување на граѓаните и компаниите во нееднаква положба пред законот при изрекување на кривичните санкции, но и да го стеснат просторот за манипулации или за определени некоректни однесувања на некоја странка што учествува во судската постапка. Досегашните анализи и истражувања на Министерството за правда и обвинителството покажале дека во Македонија во изрекувањето кривични санкции се забележуваат определени аномалии и недоследности кои ги ставаат граѓаните во нееднаква положба пред законот. Така, за едно исто дело, некои судови изрекувале поблаги, а други потешки и посериозни санкции кон граѓаните, а судиите не го почитуваат законскиот опсег даден за изрекување на казните, или горна и долна граница. Затоа со измените се дава правна основа за донесување Правилник за одмерување на казните, кој треба да го изработи судот, а да го донесе претседателот на Врховниот суд на Македонија, со учество и по обезбедено мислење од Јавниот обинител и од Адвокатската комора. Опозицијата смета дека овие одредби се противуставни и оти со нив се дерогира воспоставениот правен систем. „Не е во ред судиите да судат по правилник, бидејќи тоа го прават согласно законите, Уставот и меѓународните договори“, рече Ердоган Сарач од партијата на Турците. „Јавното обинителство е орган за прогон и тоа не може да ги одмерува казните. тоа го прават судиите и тоа по закони и Устав, а не по Правилник“, рече Горан Сугарески од СДСМ.