Опозициската СДСМ се сомнева во малверзации во договорите кои владата ги прави со Субрата Рој, владејачката ВМРО ДПМНЕ пак обвинува дека СДСМ ги минира инвестициите во државата Од СДСМ побараа на увид да излезат сите договори што се прават со контраверзниот индиски бизнисмен, а посочија дека владата пред да потпишува договор треба да почека да се расчистат сите сомнежи за финансиската состојба на индискиот  милијардер. Опозиционерите истакнаа дека ќе ја поздрават секоја инвестиција што вистински отвора работни места, но се сомневаат на можни малверзации кога станува збор за Субрата Рој. „СДСМ инсистира пред Владата да му подари на Субрата Рој плодна земја, да одговори на прашањата кои се парцелите кои ќе му бидат продадени, колку чини земјата која ќе ја продаде Владата и која цена ќе ја плати Субрата Рој, како и меѓу другото зошто не се почека да се расчистат обвинувањата за криминал во Индија“, изјави портпаролот на СДСМ Петре Шилегов кој побара пред потпишување на договорите, Владата да го објави текстот на договорот.

Од СДСМ повикаа Владата да не влегува во нови, за нив сомнителни договори.

„Ако Субрата Рој ги излажал индиските инвеститори, која е гаранцијата дека нема да не излаже и нас, ако се има предвид дека влогот на Македонија е македонскиот бисер – Охридското езеро? Со евентуален неуспех, цената којашто ќе ја плати Македонија е огромна и од финансиски, и од социјален, и од еколошки аспект“, истакна Шилегов.

ВМРО – ДПМНЕ: СДСМ паничи

Од ВМРО – ДПМНЕ ги обвинија СДСМ дека креваат паника и истакнаа дека кога СДСМ била на власт воопшто не носела странски инвестивии, нешто што според нив,  сегашната владина политика го прави.