Два дена откако помина маршот на кој студентите го искажаат своето „НЕ“ за екстерното тестирање, денеска се огласи и претседателот Ѓорѓе Иванов по ова прашање.

Имено, тој својот став и мислење ги искажа при постета на струмичко Ново село од позиција на претседател, но и на  универзитетски професор, како што кажа самиот.

-Не само кај нас, туку во целиот свет има реформи во високото образование, и тие бараат вклучување на сите надлежни субјекти за изнаоѓање најдобри можни решенија  кои што ќе бидат од корист и за институциите и за студентите. Потребно е да се слушне гласот на студентите, и да се разговара за нивните сознанија и ставови, рече Иванов.

За студентите изјавата на претседателот претставува уште една манипулација како онаа на министерот Адеми.

-Оваа изјава требаше да ја даде кога ги изнесовме нашите барања и проблеми, а не денеска, од некое место во внатрешноста, на настан кој нема допирна точка со целиот овој процес. Треба да излезе пред нас и да разговара. И него го каниме да дојде и со нас да разговара, вели Марко Џамбазоски од Студентскиот пленум.

Студентите денеска испратија уште едно писмо на министерот Абдилаќим Адеми, во кое тврдат дека од него не бараат оставка, туку откажување од проектот за екстерно тестирање.