Денеска во општина Струмица беше отворена канцеларија за имплементација на европските проекти. Досега се реализирани 8 проекти со над три милиони евра, а од Брисел е добиена и писмената согласност за изградба на прочистителната станица во вредност од 9,8 милиони евра и три проекти вредни 700 илјади евра се во фаза на имплементација, посочуваат од општината, од каде додаваат и дека се лидер во земјава во делот на искористување на пари од европските фондови. „Ние сме прва општина која отвора канцеларија за имплементација на европски проекти. Оваа канцеларија е исчекор на Струмица пред сите други општини, го гледате амбиентот кој е во согласност со европските стандарди, тоа што значи европско работење заради креација и реализација на европските проекти. Знаеме дека Македонија не важи за силен имплементатор на европските пари, многу пари пропаѓаат, се враќаат и не се користат, во тој правец оваа канцеларија треба на Струмица и струмичкиот регион да и помогне многу во имплементацијата“, изјави денеска градоначалникот на општината Зоран Заев.