Српскиот министер за одбрана, Александар Вулин, во врска со изјавата на хрватската претседателка, Колинда Грабар-Китаровиќ, дека Хрватите и Албанците се браќа по оружје, рече дека му е многу жал затоа што хрватската политика не може да се ослободи од длабокиот комплекс кој го чувствува кон Србите и Србија.

„Единствен критериум да бидете браќа со Хрватска е да сте учествувале во убивање Срби. Жал ми е што е така и што хрватската политика не е во состојба да пронајде друг начин да се поврзе со своето окружување и да пронајде друга вредност поради која некого би ги нарекла свои браќа“- изјави Вулин, коментирајќи ја изјавата на Грабар-Китаровиќ.

Тој кажа дека учествувањето во убивањето Срби не е нешто поради кое треба да се збратимите со некого.

Грабар-Китаровиќ во говор во текот на посетата на Тирана говореше за трајното и неразделно пријателство меѓу Албанија и Хрватска и улогата на албанското малцинство во хрватското општество.

„Буквално бевме браќа по оружје пред да влеземе заедно во НАТО во 2009 година. Многу Албанци ги жртвувале своите животи за Хрватска и верувајте ми дека Хрватска нема да го заборави тоа“- рече таа.

Српскиот претседател,  Александар Вучиќ рече дека на Србија не ѝ се потребни браќа туку пријатели.