Aмериканскиот Стејт департмент во новиот извештај ја обвинува македонската Влада за неуспех целосно да го почитува владеењето на правото, при што се наведува високо ниво на корупција, протекција и селективни судски постапки.

Објавувањето на извештајот за човековите права во светот следеше ден подоцна откако претседателот Ѓорге Иванов, објави прекин на кривичните постапки против политичари и владини претставници кои се осомничени за вовлеченост во прислушувањето на илјадници луѓе.

Стејт департментот наведува дека властите во земјава и во 2015 година ги продолжиле напорите за ограничување на слободата на медиумите и се мешале во судството и селективното гонење.

„Политичкото мешање, неефикасноста, протекцијата и непотизмот, пролонгираните процеси, кршењето на правото на јавно судење и корупцијата го карактеризираа судскиот систем“- стои во извештајот.

Неколку часа пред вчерашното објавување на извештајот портпаролот на Стејт департментот, Џон Кирби изјави дека Вашингтон е „длабоко загрижен“ од најавата на Иванов да им прости на лицата кои се предмет на истрага во врска со скандалот со прислушувањето.