Постојат огромни разлики во рамките на Европската Унија(ЕУ) кога станува збор за начинот на кој луѓето живеат, од големината и квалитетот на сместувањето, до клучното прашање: дали тие го поседуваат својот дом или плаќаат кирија.

Најновото издание на публикацијата „Домување во Европа, 2025“, објавена од Евростат, носи интересни податоци што откриваат културни и економски поделби на континентот.

Иако поседувањето сопствен покрив над главата е сè уште доминантен тренд во Европската Унија, разликите меѓу поединечните земји се драстични, особено кога ќе ги споредите земјите од Источна и Југоисточна Европа со оние на Запад.

Според податоците за 2024 година, 68 проценти од населението во ЕУ живее во свој дом, додека преостанатите 32 проценти изнајмуваат станови. Сепак, просекот крие големи варијации.

Земјите во нашата средина и Источна Европа водат по бројот на сопственици на недвижности. Најголем дел од населението што живее во свои домови е забележан во:

Романија (дури 94 проценти),

Словачка (93 проценти),

Унгарија (92 проценти),

Хрватска (91 процент)

Од друга страна, ситуацијата во економски најсилната земја од ЕУ е сосема поинаква. Германија е единствената земја од ЕУ каде што изнајмувањето е почесто од поседувањето имот. Дури 53 проценти од населението таму има статус на закупец.

По неа следува Австрија, каде што 46 проценти од луѓето изнајмуваат дом, и Данска со 39 проценти.

foto freepik.com