Кредитната агенција Стандард и Пурс го потврди стабилниот кредитен рејтинг на Македонија.

Од кредитната агенција оценуваат дека во економијата има позитивни трендови и изразуваат очекувања дека невработеноста ќе продолжи да опаѓа, а носител на економскиот раст ќе бидат слободните економски зони. Очекуваат во 2020 година невработеноста да изнесува 21,5%.  Агенцијата забележува дека државниот долг иако е пораснат, може да се квалификува како низок во споредба со земјите со ист кредитен рејтинг. Оттаму како најголема закана за македонската економија ја гледаат политичката криза.

Од Стандард и Пурс сметаат дека дека политичката ситуација станала уште покомплицирана по спроведувањето на изборите во декември 2016 година. Според нив, дури и да се формира влада, таа нема да биде стабилна и нема да може да биде носител на реформски процеси.

Во февруари годинава и кредитната агенција Фич го потврди кредитниот рејтинг на Македонија, наведувајќи дека согласно економските перформанси, Македонија заслужува повисок рејтинг од сегашниот, но поради политичката криза не можат да дадат повисок рејтинг.