8 Септември - најважниот празник за Македонија се најде и на почетната страница на гигантот Гугл.

Карактеристичното лого е заменето со боите на Македонското знаме кое пак е сместено како што може да забележите во средишниот дел на логото.

Денешниот празник ја означува сувереноста, независноста и самостојноста на Македонија и македонскиот народ.

На 8 септември 1991 година убедливо мнозинство - 95% од граѓаните што излегоа на референдумот, позитивно одговорија на референдумско прашање: „Дали сте за самостојна Македонија со право да стапи во иден сојуз на суверени држави на Југославија“?

На гласањето, според официјалните податоци, од 1.495.626 гласачи излегле 1.132.981 граѓанин со право на глас или 71,85 отсто, а од вкупниот број граѓани кои гласале на Референдумот позитивно се изјасниле 1.079.308 граѓани односно 95,09 отсто (односно 72,16 % од вкупниот број на граѓани со право на глас). Резултатите само по себе говорат за успешноста на Референдумот. Во официјалниот извештај на Комисијата за спроведување на Референдумот се вели дека за начинот на кој беше спроведен не беа поднесени приговори или жалби поради неправилности или повреди на одредбите на Законот за републички Референдум. Комисијата ја констатирала масовноста на граѓаните со право на глас во Македонија кои се изјасниле "за" самостојна и суверена Македонија.

На референдумот му претходела Декларација за независност што првиот повеќепартиски Македонски парламент што ја усвоила на 25 јануари 1991 година.

Денес славиме 24 години Независна и Суверена Македонија.

Денес оставете ги вашите срца нека бидат полни со гордост, достоинство, и надеж. Надеж дека Македонија ќе слави уште многу јубилеи. Надеж дека ќе скршнеме во вистински правец и надеж дека на идните генерации ќе им подариме подобар живот и земја каква што заслужуваат.