Секој потрошувач во Србија кој се сомнева дека добил неисправна декемвриска сметка за струја, може да ја рекламира и да ја провери до крајот на јануари. Ако се докаже дека неговите сомнежи биле оправдани и дека платил повеќе отколку што потрошил, парите ќе му бидат вратени веднаш или ќе му бидат одбиени од следната сметка, најави новиот директор на „Електростопанство Србија - Снабдување“ Жељко Марковиќ. Тој им препорача на граѓаните прво да си ја проверат состојбата на броилото и да ја споредат со износот на декемвриската сметка, а акоцифрите не се совпаѓаат да се обратат во електродистрибуцијата. Марковиќ очекува во јануарските сметки да нема грешки. „Од 3,5 милиони потрошувачи, имавме само 30.000 рекламации, што е малку повеќе од вообичаено. Немаше намерно зголемување на сметките, туку дојде до грешка во читањето на броилата“, рекол тој. Директорот на „Електростопанство Србија - Снабдување“ беше сменет заради многубројните поплаки на декемвриските сметки, а од новиот, министерката за енергетика Зорана Михајловиќ побарала подобра соработка и грешките веќе да не се повторуваат. .