„Железници Србија“ од снежното невреме што последните неколку дена ја зафати земјата, ќе претрпат штети од најмалку 25 милиони динари или околу 215 илјади евра. Најголема е штетата во товарниот сообраќај. Заради товарните возови што не сообраќаат во изминатите пет дена, Железницата изгубила 180 илјади евра. Остатокот е штета предизвикана во патничкиот сообраќај - непродадени билети, трошоци за сместување и автобуски превоз на патниците. Дополнително ќе треба да се пресметаат и индиректните штети, кои опфаќаат трошоци за чистење на пругите, ангажирање на механизација, зголемена потрошувачка на гориво, со што штетите можат и повеќекратно да се зголемат. И натаму е во прекин сообраќајот на пругата Панчево-Вршац, каде што огромни снежни наноси потполно завеаја две локомотиви. Железничарите на таа делница работат деноноќно за да ја оспособат пругата.