Трговската размена меѓу Србија и Русија се зголемува.

„Трговската размена меѓу Србија и Русија продолжува да расте и да се развива дури и во предизвикувачки деловни услови, со цел понатамошно зајакнување на економските односи и приближување кон нивоата од периодот „пред почетокот на специјалната воена операција“, изјави денеска министерот без ресор задолжен за меѓународна економска соработка Ненад Поповиќ.

Во Белград, по седницата на Меѓувладиниот српско-руски комитет за трговска, економска и научно-техничка соработка, тој истакна дека на Србија ѝ се потребни најевтиниот руски гас и нафта бидејќи тоа обезбедува стабилно снабдување, безбедност за економијата и граѓаните и непречен раст на економијата.

„Србија добива гас од Русија под најповолни услови и по најниска цена во Европа, и најважно: има загарантирани количини на гас, што е важен фактор за енергетската стабилност“, рече Поповиќ.

Тој ѝ се заблагодари на Русија за, како што рече, „давањето принципиелна и доследна поддршка на територијалниот интегритет и суверенитет на Србија, особено во однос на нејзината јужна покраина Косово и Метохија“.

По состанокот, Поповиќ и рускиот министер за економски развој Максим Решетников го потпишаа Протоколот за договорените активности.

Претставници на надлежните институции на двете земји ја потпишаа српско-руската програма за економска соработка за периодот од 2026 до 2031 година и Меморандумот за меѓусебно разбирање во областа на високото образование, Меморандумот за соработка во областа на научните, научно-техничките и иновативните активности и Меморандумот за соработка во областа на здравството.

Беа разменети и меморандуми за соработка во производството на вино и други производи од грозје, како и за безбедна употреба на средства за заштита на растенијата и исхрана на растенијата во растителното производство.